Andro vitsivitsy izay no lasa, notolorana fanomezana izay heverina fa nanandrify azy ny reny. Tsy ho diso anjara ihany koa ny ray, afaka andro maromaro. Hanatanteraka seho natokana ho azy ireo ny tarika Gasy Miangola sy ny Andriampaniry. «Hiram-pitia ho an’i Dada», hotontosaina eny amin’ny efitrano malalaky ny Karaoke 411, Ambatolampy Tsimahafotsy, ny alahady 18 jona izao, manomboka amin’ny 1 ora sy sasany tolakandro.
Tsy hiala lavitra ny hira momba ny ray ireo hira hokaloin’ireto tarika roa miangaly ny kalon’ny fahiny sy ny hiran’ny omaly ireto. Manana maro amin’izany rahateo ireo mpamoron-kiran’ny taona 1950, 1960, … 1970… Na izany aza, tsy afa-miala amin’ny ankohonana, eo amin’ny tontolon’ny fitiavana, sns, ny ray. Noho izany, hokaloina eny an-tsehatra ihany koa ny momba ireo.
Tarika Gasy Miangola, mandia ny faha-25 taona nijoroany. Andriampaniry mianadahy, tanora misandratra eo amin’ny famelomana ny kalon’ny omaly. Samy hanakaiky ny mpitia zavakanto izy ireo amin’io fotoana io.
HaRy Razafindrakoto
French