“Miroso araka ny tokony ho izy ny fanomanana ny fanadinam-panjakana eto amin’ny Nosy”, hoy ny minisitry ny Fanabeazam-pirenena, Sahondrarimalala Marie Michelle, raha nanontaniana, teny Andohatapenaka, ny sabotsy lasa teo. Nilaza izy fa nisy fanatsarana ihany nataon’ny fitondram-panjakana mandritra ny fizotry ny fanadinana amin’ity taona ity. Tanjona ny hanatsarana sy hampiakarana ny voka-panadinana. Nohatsaraina ny kalitaon’ny taratasim-panadinana eny anivon’ny ivontoeram-panadinana tsirairay avy manerana ny Nosy, raha ny nambarany. Nampitomboina ihany koa ny ivontoeram-panadinana manerana ny Nosy. “Nasiana ivontoeram-panadinana hanalana bakalorea, avokoa ny distrika rehetra manerana ny Nosy mba hialana amin’ny dia an-tongotra lavitra be ataon’ireo ankizy hiatrika ny fanadinana”, hoy hatrany izy. Nanampy betsaka nanatanteraka izany, ny filohan’ny Repoblikan’i Madagasikara sy ny Praiministra. Ho tanterahina ny 20 jona hoavy izao ny fanadinam-panjakana ambaratonga voalohany (Cepe) eto amin’ny Nosy. Mbola manana valo andro ireo ankizy hanomanana ny saina sy ny vatana ary ny lafiny ara-pitaovana rehetra hoenti-miatrika ny fanadinana. Marihina fa 515 081 ireo mpiadina fanadinana CEPE manerana ny Nosy.
Mino (mpianatra asa)
French