Sahirana ireo olona hiondrana handray « vedette » na lakana eo amin’ny seranan-dakana eo Mahavatse II, ao anatin’ny kaominina ambonivohitra Toliara amin’ny fofona (vokatry ny tay miparitaka) sy ny loto miparitaka eo an-toerana.
Efa nataon’ny mpitantana ny tanàna ho laharam-pahamehana ny fahadiovana sy ny ady amin’ny fangerena ankalamanjana fa mbola sarotra ny ady, hoy ny lefitra faharoan’ny ben’ny Tanàna misahana ny drafitry ny tanàna sy ny fahadiovan’ny daholobe, Manasoa Andriamirify Patrick. 20% amin’ny vahoaka ihany no mandray ny fanentanana sy manaraka ny toromarika momba ny ady amin’ny fanaovana maloto ankalamanja sy fahadiovana amin’ny ankapobeny, araka ny fanamarihany hatrany. Maro ny ONG mifarimbona amin’ny minisiteran’ ny Rano sy ny fanadiovana ary fidiovana manentana eny ifotony fa mila fotoana maharitra ny fiovan’ny toe-tsain’ ny mponina. Kolontsaina raiki-tapisaka ny fangerena ankalamanjana ary anisan’ ny toerana hanaovan’ny besinimaro izany ny morondranomasina ao Mahavatse II. Maro ny mpizahatany miandry fiondranana mahita ny zava-misy ka mitondra sary ratsy ho an’i Madagasikara.
Ilaina ny fampiharana sazy ho an’ireo mpangery ankalamanjana hampahomby ny ady, araka ny heviny. Tsy misy lalàna manasazy hatramin’izao fa lamandy fotsiny no aloa raha tratra manao maloto ankalamanja. « Fanagadrana mihitsy no mendrika ny mpangery ankalamanjana ary hanao ezaka manokana ny departemanta misy azy hametrahana lalàna hanagadrana izay tratra rehetra. Mila fiaraha-miasa amin’ny lehiben’ny fokontany enina koa hanampy amin’ny fanentanana ny mponina », araka ny fanehoan-keviny ihany.
Nanambara ny minisitry ny Jono sy ny toekarena manga, Mahatanty Paubert fa efa nametrahana toeram-pivoahana teo amin’ny seranan-dakana eo Mahavatse II fa tsy nisy nampiasa mihitsy ka rava ho azy ilay fotodrafitrasa. Ny toe-tsaina mihitsy no mila harenina hanovana ilay kolontsaina.
Vonjy
French