Nifarana ny zoma teo ny hetsika fankalazana ny iray volan’ny teny malagasy, teny anivon’ny Ecole normale supérieure (ENS) Ampefiloha. Nokarakarain’ny mpianatra rehetra teo anivon’ny sekoly. Nampitondrainy ny lohahevitra hoe: “Teny malagasy, fototra mampandroso ny fanabeazana”.Tanjona ny hanandratana ny teny sy ny maha-Malagasy manoloana ny rivotra mitsoka avy any ivelany. Nanambara ny tale mpitantana ny ENS Ampefiloha, Dr Rasendrahasina Vonjy fa: “lasa antsirambina ny fampiasana ny teny malagasy eto amintsika”. Nilaza izy fa manana andraikitra goavana manoloana izany ny sekoly, mba hamerina ny hasina sy hanandratra avo ny teny malagasy. “Antoka iray anisan’ny mampandroso ny firenena sy ny fanabeazana izany”, hoy izy. Tokony ho vahindohan-draharahan’ny fanjakana, noho izany, ny hanome vahana ny teny malagasy amin’ny sehatra rehetra (raharaham-panjakana, raharaha politika…). Mety ho sarotra ny fampitana ny fanabeazana raha toa ka tsy manome lanja izany isika eto Madagasikara. Nivelona tamin’ny fanaovana antsan-tononkalo, kabary nifambidiasana, fampirantiana ny maha-Malagasy, hetsika ara-javakanto ary nofaranana tamin’ny vela-tsihy ny hetsika, nandritra ny roa andro.
Mino (mpianatra asa)
French