Hitohy any Antanifotsy indray ny seho an-tsehatra iarahana amin’ireo mpilalao tantara amin’ny onjam-peo. Hiseho vahoaka any an-toerana ny alahady 2 jolay izao, amin’ ny 1 ora sy sasany tolakandro, ao amin’ny kianja malalaka Mb Terezy i Niravo, Rakoto, Faly, Synèse ary Antsa Ravaka. Holalaovin’izy ireo an-tsehatra amin’izany ilay tantara nosoratan’i Niravo Randria, “Anjara voasedra ve?”. Hisongadina amin’izany tantara izany ny fiainana andavanandron’ny fiarahamonina sy ny olan’ny tokantrano. Ny olana eo amin’ny mpivady sy ny mpifankatia ary ny adin-tsaranga, anaty tontolo samihafa. Hampitana ny anatra sy ny hafatra ho an’ny tanora sy ny ray aman-dreny izany seho an-tsehatra izany fa eo koa ny fampihomehezana sy ny fitaintainana ary koa ny alahelo. Hifanakaiky kokoa ny mpilalao sy ny mpankafy amin’io fotoana io, raha nohenoina tany anaty onjam-peo hatramin’izay. Hanelanelana izany ny hira sy ny fanentanana samihafa. Handrindra ny lafiny teknika sy ny sehatra i Bruno Rakotomalala.
Tsiahivina fa efa avy nanao seho an-tsehatra teny Andranoro sy Ambohimiandra, Ampangabe ireto mpilalao tantara amin’ny onjam-peo ireto ary izao hitodi-doha any Antanifotsy izao indray.
Nanangona :
HaRy Razafindrakoto
French