Nitsefotra ! Tsy tratra ny fetrisa,101, tamin’ny latsa-bato tokony hanonganana ireo mpikambana sasany eo anivon’ny birao maharitra eo anivon’ny Antenimiera. Voatana amin’ny sezany izany ny filoha lefitra, ho an’ny faritanin’i Toliara, Rabenirina Jean Jacques sy ny an’ny faritanin’i Fianarantsoa, Razafintsiandraofa Brunelle. Mbola eo amin’ny toerany koa ny kestora III, Rabeniriana Mamy. Samy tsy nahatratra ny fetrisa fanonganana avokoa ireo nandatsa-bato : 88 sy 78 ary 76 izany ho azy telo mirahalahy ireo raha tokony hahatratra ny fetrisa 101 izany, tamin’ny latsa-bato natao, halina.
Voaongana amin’ny toerany kosa anefa ny filohan’ny vaomieran’ny harena an-kibon’ ny tany, ny depiote Mohamad Ahmad. Tsy ilana fetrisa izany ka depiote miisa 128 ny nandany ny fanonganana, miaraka amin’ny fanomezana alalana “Procuration”, amin’ny tsy maha eto an-toerana ireo depiote sasany.
Efa tamin’ny 8 ora alina vao nanomboka ny latsa-bato fanonganana. Miisa 90 ireo depiote niatrika izany, ankoatra ireo nanome alalana. Nialohavan’ny fandresen-dahatra fiarovana ireo haongana izany ka anisan’ny niaro ny filoha lefitra, Rabeniriana Jean Jacques sy Razafintsiandraofa Brunelle ny depiote isany, i Johasy Eleonore sy i Voninahitsy raha nisolovava niaro ny kestora III, Rabenirina Mamy kosa ny depiote Tim, Ralambozafimbololona Fetra. Ho azy ireo, tsy mitombina sy tsy misy porofo ny fanonganana.
Synèse R.
French