Hiara-miasa amin’ny ben’ny Tanàna sy ny lehiben’ny fokontany ny filoha Rajoelina Andry, raha ny nambarany teny amin’ny CCI Ivato, omaly. ”Tsy hisy kaominina sy fokontany hadino”, hoy izy.
“Teniko ombieny ombieny ny hoe tsy hisy distrika hadino intsony. Nanaovana fotodrafitrasa avokoa ny distrika rehetra. Miditra amin’ny dingana goavana isika izao: tsy misy kaominina sy fokontany hohadino intsony. Hiara-miasa akaiky aminareo ben’ny Tanàna sy lehiben’ny fokontany manerana ny Nosy ny tenako.” , hoy ny filoha Rajoelina Andry, omaly. Lahateny nataony tamin’ny fanombohana ny vovonam-pirenena fankatoavana ny Drafi-pirenena momba ny fitsinjaram-pahefana miabo (PNDE), teny amin’ny CCI, Ivato. ”Zava-dehibe amin’ny fampandrosoana ny firenena ny fampandraisana andraikitra ny vondrombahoakam-paritra. Tsy atao resaka na kabary ny fitsinjaram-pahefana, fa iainana sy tanterahina.”, hoy izy
Manakaiky vahoaka
Mba hanomezana hasina sy lanja ny faritra, novaina ho governora ny lehiben’ny faritra. Tanjona ny fanakaikezan’ ny fanjakana ny vahoaka. Fanaovana fotodrafitrasa manakaiky sy ilain’ny vahoaka izany. “Tsy manao resaka ambony latabatra isika, fa efa ao anatin’ny fanatanterahana”, hoy izy. Manamafy an’izay izao vovonana nasionaly izao, iarahana amin’ny mpiara-miombon’antoka.
Mila manakaiky ny distrika ny fampandrosoana no antony nametrahana ny faritra Vatovavy. Eo koa ny faritra Ambatosoa. Misy ny zavatra azo lotoina sy haratsiana, fa tsy azo ravana na potehina amin’izay ataon’ny tena. “Isika izao no nanorina fotodrafitrasa be indrindra akaiky sy ilain’ny vahoaka”, hoy ihany izy. Na izany aza, be ny tokony hatao. Mora ny mampanantena fa sarotra ny manatanteraka. Tanterahina izay lazaina. Mbola be ny tokony hotanterahina mba tena hipaka eny anivon’ny vahoaka ny fampandrosoana.
R. Nd.
French