Nikasa hanolana ny anabaviny : voaheloka 5 taona an-tranomaizina i Galy

Niakatra fitsarana ady heloka bevava tao Toamasina, omaly, ny raharaha anenje­hana an’i Issai Galy, araka ny antontan-taratasin’ady laha­rana faha 40-Toa/23-2715-Rp/22. Loham-piampangana anenjehana azy ny fikasana hanao fanolanana tamina ankizivavy tsy ampy taona. Voafaritry ny lalàna famaizana izany ka dimy taona an-tranomaizina asa an-terivozona miampy fandoavana onitra
2 tapitrisa Ar ho an’ny niharam-boina. Tao amin’ny fokontany Ampanotoamaizina Am­bodiatafana, kaominina am­banivohitr’Ambinaniniony, distrikan’i Brickaville no nitrangan’ ity fikasana hanao fihetsika mamoafady ity, ny 13 aogositra 2022. Nisy fetim-pianakaviana famadihan-drazana tao amin’ity fokontany ity tamin’io fotoana io. Nandritra izany anefa, naniraka an’ilay ankizivavy ity anadahiny ka nam­panantenainy fa omeny vola aorian’izay. Tonga ny tamin’ny 10 ora alina, nentiny nivoaka hiaraka aminy hoe haka vola any an-tranony ilay anabaviny. Nony tao an-trano, nakaton’i Issai Galy ny varavarana ka norahonany tsy hivoaka in­tsony ity anabaviny. Notampe­nany ny vavany ka notereny hanala ny akanjony. Tonga tampoka anefa ny reniny ka tratra teo izy efa saika hanampatra ny filan-dratsiny tamin’ity ankizivavy ity.

J.C