Hatao any Japana, ny 23 hatramin’ny 30 jolay izao, ny fiadiana ny ho tompondaka eran-tany, taranja lomano, 50 metatra. Solontena malagasy i Jonathan sy i Tendry.
Tsy diso anjara amin’ny fifaninanana goavana tanterahina any Japana i Madagasikara. Solontena roa no hiaro ny voninahi-pirenena mandritra ny fiadiana ny ho tompondaka eran-tany, ho an’ny dobo filomanosana 50 metatra. Raharvel Jonathan Harivony, izay manaraka fiofanana omen’ny Fédération internationale de natation (Fina), any Thaïlande, ny solontena malagasy voalohany. Ny lomano eo amin’ny sokajy 100m Brasse sy 100m Nage libre no hifaninanan’ity mpilomanon’ny Cosfa ity.
Solontena malagasy sokajy vehivavy kosa i Tendrinavalona Idealy, laharana voalohany tamin’ny filaharana nandritra ny fiadiana ny tompondakan’i Madagasikara farany teo, natao tany Toamasina. Eo amin’ny 50m Dos sy 100m Dos no hifaninan’i Tendry, mpilomanon’ny Cosra Antsirabe, mandritra ity fiadiana ny tompondaka eran-tany ity. Tsiahivina, efa nandray anjara tamin’ny “Mondiaux” tany Melbourne Australie izy mianadahy ireto, ny volana desambra 2022 teo. Nahavita nanatsara ny zava-bitany tsara indrindra miisa roa i Jonathan tamin’io fotoana io. Hanainga ny 18 jolay izao i Tendry miaraka amin’ny filohan’ny delegasiona malagasy, ny sekretera jeneralin’ny federasiona malagasin’ny lomano, Randrianasolomanana Ramy.
Hiara-dalana amin’izy ireo ny mpanolotsain’ny ligin’Analamanga, i Emilien Tovoniaina, izay nahazo fiofanana avo lenta tany Suisse. Hihazo mivantana an’i Japana kosa i Jonathan.
Mi.Raz
French