Hanatsarana ny fomba fambolena nentim-paharazana amin’ny fampitomboana ny karazana voly atao sy hampiroborobo ny teknika agroekolojika ary ny fahafaha-miatrik’ireo tantsaha ny fiovan’ny toetr’andro. Ireo ny tanjona apetraky ny tetikasa «Projet d’appui aux relèvements et de résilience des 3 régions du Sud» (PA2R). Hiasa amina faritra telo any atsimon’ny Nosy ny tetikasa dia ny faritra Androy, Anosy ary Atsimo Andrefana. Hisitraka izany ny tokantrano 28 000, tantsaha, avy amina kaomina 59, ao amin’ireo faritra ireo. Miompana amin’ny famerenana ny fahafaha-mamboly sy miompy ho an’ireo tantsaha tena marefo ny sehatrasan’ny “PA2R”. Ao ihany koa ny fanatsarana ny fanjarian-tsakafon’ireo tantsaha.
Paikady
Mandritra ny telo taona hiasany, hitondra fanavaozana eo amin’ny tontolon’ny fambolena sy ny fiompiana ny « PA2R », noho izy, manana drafitrasa enti-manatanteraka izany. Hametraka fotodrafitrasan-drano eny anivon’ny kaominina sy ny faritra ny tetikasa. Tafiditra amin’izany ireo lavadrano samihafa. Hizara hanam-pamokarana 20 000 koa ny tanjony. Ankoatr’izay ny fizarana fitaovana ho an’ny fiompiana 6 000 sy fitaovam-panjonoana 500. Laharam-pahamehan’ny « PA2R », ny hampiroborobo ny fanjarian-kanina. Hanao vaksiny ireo biby fiompy ihany koa izy hanamafisany ny fiarovana azy ireny.
Henintsoa H.
French