Tontosa ny sabotsy teo, tetsy amin’ny Plaza Ampefiloha, ny fandefasana ny sarimihetsika malagasy, mitondra ny lohateny “Iza”, fizarana voalohany. “Iza”, novokarin’ny trano mpamokatra Miguel Production, tantara nosoratan-dRaharilanto Mampyoun. Nahasarika mpijery maro (olon-dehibe, zaza, tanora) izy ity. Niompana tamin’ny tantarana mpirahalahy mpinamana teo amin’ny tanàna iray ny vontoatin’ny tantara. “Nanjakan’ ny fitiavan-tena sy te hanjaka tokana ny anankiray ka namosavy ny namany”, hoy ny tomponandraikitra voalohany, Raharilanto Herizo Mampyoun.
Sarotra ny fanatontosana sarimihetsika eto Madagasikara amin’ny ankapobeny. «Antony, ny tsy fahampian’ny hoenti-manana, ny fitaovana ary ny fotoana », hoy ny mpilalao horonantsarimihetsika, Rakotovelo Franck Olivier (Naivo). Nilaza izy fa tsy maintsy handoavam-bola avokoa na ny toerana hanodinana izany aza. Ankoatra izay, mihena ihany koa ny fitiavan’ny Malagasy ny sarimihetsika raha oharina tamin’ny teo aloha.
Miezaka, noho izany, ny mpamokatra sy ny mpilalao ary ny teknisianina hanome fahafaham-po ny mpijery, raha ny fanazavany. Hatsaraina ny fomba filalaon’ireo mpandray anjara mamelona ny horonantsary sy ny lafiny teknika rehetra. Tanjona ny hamerenana ny fankamamian’ny Malagasy ny sarimihetsika malagasy. Haparitaka manerana ny faritra maro ny fandefasana azy. Hisitraka izany kosa ny any Antsirabe, ny 6 aogositra ho avy izao.
Mino
French