Nanomboka omaly ka hatramin’ny zoma izao, ny hetsika “Semaine économique de l’AEMAJA” andiany faharoa. Hetsika manome tombony eo amin’ny fifandraisan’ny firenena japoney sy Malagasy, indrindra eo amin’ny sehatry ny toekarena. Misahana sehatra maro eo amin’ny tontolon’ny fandraharahana ny Association économique Madagascar Japon (AEMAJA) . Tombony ny fifaneraserana, fifanakalozan-kevitra sy traikefa ary fananganana fandaharanasa iarahana. Eo koa ny fiaraha-miasa eo amin’ny firenena roa tonta amin’ny fampiharana ny traikefa japoney, amin’ny alalan’ny teknika « Kaizen ». Hatsangana ny tranoben’ny fifanakalozana hanatsarana ny fifandraisan’ny roa tonta, ho fampiroboroboana ny toekarena malagasy sy japoney. “Maro ireo dingana entina hanatanterahana ity tetikasa ity amin’ny fampandraisana andraikitra ny firenena roa tonta”, hoy ny fanazavan’ny filohan’ny AEMAJA, Ratodisoa Ando. Mbola vitsy ny fikambanana japoney eto Madagasikara, antony mahatonga azy ireo misokatra amin’ireo orinasa any Japon ahafahana manohy ny dingana hafa.
Vina
« Mitana andraikitra goavana eo amin’ny toekarena malagasy ny orinasa Ambatovy. Tokony hisy ihany koa tetikasa hafa tahaka azy», hoy ny masoivohon’i Japon eto Madagasikara, Abe Koji. Tokony hiezaka hanatsara ny fotodrafitrasa eto an-toerana koa ny fanjakana Malagasy, hampiakarana ny toekarena malagasy.
Henintsoa Hani
French