Maty voatifitry ny zandary tao Ankazobe, afakomaly, ireo dahalo raindahiny roa lahy antsoina hoe i Kekely sy i Mara. Tratra teny amin’izy ireo ny basim-borona sy odiratsy marobe.
Voarohirohy ho tompon’ antoka tamina halatra omby sy fakana an-keriny ary vonoan’olona tamin’iny faritra Ankazobe iny ireto malaso ireto. Ny 17 jolay 2023, nahazo fampitam-baovao momba an’i Kekely sy ny namany ny zandary. Nametraka ny paikady avy hatrany ny zandary tamin’ny alalan’ny fametrahana sakana amin’ireo lalana sy kizo mety handalovan’ireo dahalo. Nifanehatra tao amin’ny kizo izay tsy mifanalavitra amin’ny tanànan’i Miarikofeno, fokontany Tsinjorano, kaominina Tsaramasoandro, distrikan’Ankazobe ny roa tonta. Tsy nanaiky hosamborina anefa ry zalahy ka raikitra teo ny fifampitifirana. Tsy naharesy tosika ny zandary anefa ny malaso. Vokany, maty tsy tra-drano Rakotoarivelo Tinasoa Fidelis, antsoina hoe, Kekely. Dahalo efa nokarohina hatry ny ela tao amin’ ny distrikan’Ankazobe sy Maevatanana ary faritra Alaotra Mangoro amina halatra omby sy fakana an-keriny ary vonoan’olona. I Mara Zafimaniry antsoina hoe i Mara, dahalo efa nokarohina ela ihany koa sady efa mpamerin-keloka. Basim-borona calibre 12 sy odiratsy maromaro ary finday roa fampiasan’izy ireo rehefa manao ny asa ratsiny no azon’ny zandary. Mbola mitohy kosa ny fikarohan’ny zandary ireo naman’izy roa lahy ireto. Tafaporitsaka nandritra ny fifandonana ny sasany amin’izy ireo na efa naratra aza. Afaka miantso ny zandary amin’ireto laharana ireto izay mahita trangana tsy fandriampahalemana amin’iny faritra iny: 034 05 700 81 – 034 14 010 24.
Jean Claude
French