“Manana solontena ny Malagasy ary vonona hibata fandresena”, io no nambaran’ny minisitry ny Tanora sy ny fanatanjahantena, Resampa André Haja, omaly, momba ny fandraisan’anjaran’i Madagasikara amin’ny lalaon’ny Frankofonia. Nambarany fa niainga, omaly, ny ampahany voalohany hiatrika ny andiany faha-9 amin’ity hetsika ity, hotanterahina any Kinshasa RD Congo, ny 28 jolay hatramin’ny 6 aogositra izao. Ny taranja Judo ihany no ho tara kely, noho ny mbola fiatrehan’ireo atleta malagasy ny fiadiana ny tompondakan’i Afrika, hatao eto Madagasikara, manomboka anio. Ny sabotsy izao no hiainga izy ireo.
Taranja roa ihany kosa no tsy hiatrika ity lalaon’ny Frankofonia ity, dia ny baolina kitra sy ny atletisma ho an’ny manana fahasembanana, noho ny antony manokana avy amin’ ny mpandray anjara.
Rakotoarimanana Fabio, atleta eo amin’ny taranja tenisy ambony latabatra, no nosafidiana hitondra ny sainam-pirenena malagasy, amin’ny fanokafana ny lalao. Rasoanaivo Razafy Laura, judokas kosa no hitondra izany, mandritra ny lanonam-pamaranana.
Mi.Raz
French