Notifirin’ny jiolahy teo amin’ny lohany ny mpamily taxi iray teny Ankadindratombo, omaly hariva. Hanavotra vehivavy iray tomponandraikitry ny tranombarotra iray voatafika izy, kanjo izao voatifitra izao.
Maty tsy tra-drano ny mpamily fiara taxi, 4L, iray teny Ankadindratombo, omaly hariva tamin’ny 7 ora, vokatry ny tifitra nataon’ny jiolahy teo amin’ny lohany. Notafihina jiolahy telo nisatroka sy nanao «capuchon» niaraka tamin’ny basy mahery vaika, ny toeram-pivarotana iray eny Ankadindratombo tamin’io fotoana io. Niditra an-keriny tao am-pivarotana ireo olon-dratsy ka namantana teo amin’ny misy ny fitoeram-bola. Norahonan’ireo jiolahy hotifirina ny vehivavy iray tomponandraikitr’ity tranombarotra ity. Lasa ny vola “versement” rehetra omaly tontolo andro. Nodarohan-dry zalahy ity vehivavy ity saingy afa-niantso vonjy ihany na teo aza izany. Naheno izany ny mpamilin’ilay taxi ka niditra hijery ny zava-misy tao am-pivarotana, kanjo tifitra teo amin’ny lohany no nitsena azy. Nanapoaka basy indroa ireo jiolahy ka ny faharoa no niantefa teo amin’ny lohan’ilay niharam-boina. Maty tsy tra-drano avy hatrany izy. Nihazo ny lalana mankany Mahazoarivo ireo olon-dratsy niaraka tamin’ny vola. Tsy nisy nahahetsika ireo olona teo amin’ny manodidina ary taitra mihitsy fa noheverin’izy ireo fa kodiarana fiara nipoaka. Ilay niharam-boina efa nitsirara nihosin-dra teo akaikin’ny fivarotana no nahataitra ny manodidina. Voalazan’ireo olona mahafantatra azy fa monina eny Ambohipo ity raim-pianakaviana ity fa miasa eny Ankadindratombo. Fotoana fohy taorian’ny fanafihana, tonga teny an-toerana ny polisy nanao fanadihadiana sy nanara-dia ireo olon-dratsy. Nihorohoro tanteraka, araka izany, ireo mponina nandritra ity fanafihan-jiolahy ity. Marihina fa tamin’ny 7 ora hariva toy izao koa ilay trangana fanafihana tamina Cash point iray eny Ankasina, afakomaly.
Jean Claude
French