Nosokafana tamin’ny fomba ofisialy omaly, teny amin’ny Ivotoeran’ny kolontsaina malagasy (IKM) Antsahavola, ny fampirantiana « Mitodiha anie e! », karakarain’ny fikambanana Varatava. Nisy ny fampahafantarana ny mahakasika ny sary miranty, nataon’ny mpahay kanto nanao azy, nandritra izany lanonana fanokafana izany. Sary maro samihafa, nataon’ny mpikambana ao anatin’ity fikambanana ity no miranty eny an-toerana, manomboka omaly hatramin’ny 16 aogositra 2023. Anisan’ny tanjon’ny fikambanana amin’ izao fampirantiana izao ny fanasongadinana ny fikambanana sy fanehoana ny fahaiza-manaon’ny mpikambana.
Sombiny amin’ny sary nataon’ny mpikambana ihany no miranty eny amin’ny IKM Antsahavola. Anisan’ny efa miranty, mandritra ity hetsika ity ihany koa, ny asa tanan’ireo vao avy niatrika ny atrikasa farany nokarakarain’ny fikambanana. Fampisehoana ny fahaiza-manaon’ny mpikambana, fampahafantarana ny fikambanana no tanjon’ny hetsika, ankoatry ny fampiroboroboana ny haikanto sy ny fampandrosoana.
Lin M.
French