Zazalahy iray tra-tehaky ny polisy nitondra fahitalavitra iray niampy kojakoja fampiasa amin’izany tao Morafeno, Toamasina, ny 1 aogositra teo. Nifanehatra tampoka tamin’ny mpitandro filaminana nanao fisafoana alina ity mpangalatra ity. Nikasa handositra vantany vao nahatazana ireo polisy io zazalahy io. Nasaina nijanona, nojerena ny teny an-tanana ka nahatrarana fahitalavitra iray. Sarona teny aminy koa ny “decodeur” fampiasa amin’izany. Natao fanadihadiana fohy, nibaboka tamin’ny polisy io mpamaky trano io. Nalainy tamina tokantrano iray ireto entana ireto. Nokasainy hamidy ny maraina izany saingy izao voasambotra izao izy. Nentina atao famotorana, natolotra ny fampanoavana io zazalahy io. Naverina amin’ny tompony kosa ireo entana very. Tsiahivina, efa mirongatra izaitsizy amin’izao fotoana ireo zaza tsy ampy taona manao hala-boty sy asa fanendahana, indrindra eto an-drenivohitra.
Tsiferana R.
French