Zaza roa kilasy T2 niharan’ny fanararaotana ara-nofo nataona talen-tsekoly iray. Naiditra am-ponja ilay nahavanon-doza, afakomaly.
Natolotra ny fampanoavana tao Ambatondrazaka, naiditra am-ponja ny talen’ny EPP iray nahavanon-doza tamina vehivavy miisa roa, afakomaly. “Efa nataony talohan’ny fialan-tsasatry ny mpianatra miisa roa io tranga io saingy nisy fiantraikany ara-pahasalamana tamin’ny iray tamin’ireo zaza izany”, hoy ny fanazavan’ny kaomandin’ny zandary ao Brieville Andriamena. Nahatsikaritra ny tsiranoka nivoaka tamin’ny zanany vavy ny renim-pianakaviana iray. Nofotopotorany io zanany io ka niloa-bava. “Nosoran’ilay tale menaka sy savony ny tanany ka natsofony tany amin’ny fivavian’ny zaza lasibatra”, hoy ny zandary ao an-toerana. Nentina nihazo ny mpitsabo ilay zazavavy 7 taona. Voamarina tokoa ny tranga nahazo azy. Natao famotorana ilay talen’ny EPP. Niaiky heloka ity farany ary nilaza tsy ho tompon’ny tenany teo am-panatontosana izany. Nohainoin’ny mpitsara mpanao famotorana izy ka izao niafara amin’ny fitazonana am-ponja izao.
Aretin-tsaina
Anisan’ny aretina mitaky fitsaboana ny fanararaotana ara-nofo ataon’ny olon-dehibe amin’ny zaza. “Aretin-tsaina ary tena mila tsaboina ny mahazo ireo olona manao io fihetsika mamoafady amin’ny zaza io”, hoy ny Dr Andrianarison Nambinintsoa, mpitsabo ao amin’ny CHU Anjanamasina. Anisan’ny mampirongatra izany matetika ny fandraisana zava-mahadomelina. “Manaitra ny filan-dratsin’ilay olona ka mitarika azy hanaotao foana izany”, hoy ny fanamafisan’ity mpitsabo ity.
Tsiferana R.
French