Misesy ny famirapiratry ny Malagasy mpanakanto, eo amin’ny sehatra iraisam-pirenena. Taorian’i Richianny Ratovo sy Fitiavana Ratovo, tany amin’ny lalaon’ny Frankôfônia, nisongadina tany Berlin ihany koa i Do-B Rasolofoarison. Tompondaka maneran-tany amin’ny BeatBox, sokajy «Vocal Scratch» mantsy i Do-B ! Tontosa omaly alina, tao amin’ny Stade Huxleys Neue Welt ao Berlin ny dingan’ny famaranana tamin’ny «BeatBox Battle World Championship». Mpanao beatBox efa manana ny lazany maneran-tany avokoa no nifaninana tamin’ny solontena malagasy, saingy nahintsany tsikelikely. Ilay frantsay
O Slim no nifanandrina farany tamin’i Do-B. Izy no nanomboka voalohany, saingy tsy taitra mihitsy ity Malagasy mpanakanto ity niatrika ny anjarany. Nanome voninahitra ny mozika afrikanina izy, ary nampiasa ny teknika mampiavaka azy manokana. Na ny mpifaninana taminy aza niaiky ny talentan’i Do-B. «Efa nanonofy ity fotoana ity aho tamin’ny 10 taona lasa», hoy ny nambaran’i Do-B. Midika izany fa tsy tongatonga ho azy, fa nofy izay tanteraka taorian’ny asa sy ezaka nilofosany. Tsiahivina fa fanaovana feon-javamaneno amin’ny vava ny beatbox, ary manakaiky an’ireo fanaon’ny mpikosoka kapila ny nifaninanan’i Do-B.
Zo ny Aina
French