Taranja baolina kitra : ho fantatra anio izay ho filohan’ny ligy 22

Hotanterahina anio ny fifidianana izay ho filohan’ny ligim-paritry ny baolina kitra manerana an’i Madagasikara. Misy ireo kandidà teo aloha, mbola mifaninana…

Hifantoka tanteraka amin’ny fifidianana izay ho filohan’ny ligim-paritra ny baolina kitra, ny ligy 22 ma­nerana an’i Madagasikara, amin’ity faran’ny herinandro ity. Ho fantatra amin’ity sabo­tsy 12 aogositra ity mantsy ireo hitantana izany ho an’ny taom-piasana vaovao. Misy ireo kandidà teo aloha, mbola miady ny hitondra izany in­dray. Anisan’ireny, ny filohan’ ny ligin’Analamanga, Rako­to­arimanana Henintsoa (Tôta).
Tsy misy mpifaninana izy fa kandidà tokana. Efa lany hi­tondra indray ny ligin’Anala­manga izany ny tenany. Ha­namafy ny toerany sy ny fitokisana aminy indray izany, ireo seksiona miisa 7 mandrafitra ny ligy eto an-drenivohitra.
Kandidà tokana ihany koa ny ao amin’ny ligin’Itasy, ka ny mpitantana teo ihany no nirotsaka. Toy izany koa ny ligin’ Atsimo Atsinanana sy Atsimo Andrefana ary Anosy. Arahin’ ny rehetra maso akaiky amin’ ity fifidianana ity koa ny ao Vakinankaratra. Hifampitana amin’i Fidy, filoha teo aloha mantsy i Herimamonjy Andria­niaina.
Namela ny toerany ho an’ ny tanora kosa i Hawell Mamo­dali, ao amin’ny ligin’i Me­nabe. Tsy nilatsaka intsony ny tenany.

Manohitra i Faneva Ima

Mifanindran-dalana amin’ ity fifidianana izay ho filohan’ ny ligy ity, ny famoriana ireo filohana klioba manerana an’i Madagasikara, ataon’Andrian­tsima Faneva Ima, kapitenin’ ny Barea de Madagascar, teo aloha. Etsy amin’ny efitranon’ ny sekoly St Michel Amparibe, no hanatontosany izany. Mi­tsipaka ny latsa-bato efa vita ny tenany, ary mitaky ny hanovana ny sata sy ny rafitra mi­fehy ny baolina kitra aloha vao miroso amin’ny fanavaozana ireo mpikambana rehetra manomboka any amin’ny seksiona, sy ligy ary federasiona.

Tompondaka