Notokanana ny sabotsy teo ny tobim-pamokarana herinaratra avy amin’ny masoandro ao Antsiranana. Olona aman’aliny no hisitraka ity fotodrafitrasa lehibe ity.
Ao anatin’ny politikam-panjakana ny fampiasana ny angovo azo avoazina mba hisitrahan’ny daholobe herinaratra. Napetraka ao Ankorikihely, kaominina ambanivohitra Ramena, distrikan’Antsiranana faha-II, ny sabotsy teo, ny tobim-pamokarana herinaratra avy amin’ ny masoandro “centrale solaire” (CS). Manana tanjaka 2,4 MWc ary mahatratra 4 735 MWh isan-taona ny herinaratra vokarina ao. Fantatra fa manana “onduleurs” 24 ity CS ity. Tombontsoa goavana ny fanànana azy. Tokantrano
3 600 no hisitrika ny herinaratra voalohany ary hahatratra hatramin’ny 19 000 ny hanjifa izany eo anivon’ny kaominina Antsiranana. Mirefy hatramin’ ny 140 225 m² ny toerana misy ity fotodrafitrasa ity ary hanala entona ratsy (CO2) milanja 1 889 t isan-taona izany. Mbola hamatsy ny tambajotran’ny orinasa Jirama ihany koa io tobim-pamokarana herinaratra avy amin’ny masoandro io.
Fiaraha-miasa
Taratry ny fampiroboroboana ny fiaraha-miasa eo amin’ny fanjakana sy ny sehatra tsy miankiana ny nahazoana izao vokatra izao. Kitro ifaharan’ny fampandrosoana ny firenena ny sehatry ny angovo. “Tanjon’ny fitondram-panjakana ny hampiakatra avo roa heny ny tahan’ny vahoaka misitraka herinaratra eto Madagasikara. Porofo, ny fananganana tobim-pamokarana herinaratra avy amin’ny masoandro, manerana ny Nosy. Mitotaly 78 izy ireo. Tsy hisy faritra, na distrika, na kaominina ho hadinoina amin’ny fampisitrahana herinaratra. Laharam-pahamehana amin’ izany ny tontolo ambanivohitra”, hoy ny minisitry ny Angovo sy ny akoranafo, Andriamanampisoa Solo, nandritra ny lahateniny. Tafiditra ao anatin’izany ny fananganana tobim-pamokarana herinaratra avy amin’ny tohodrano lehibe.
Henintsoa Hani
French