Nanaraka fiofanana ireo tomponandraikitra miady amin’ny aretina tazomoka ao amin’ny fitaleavam-paritry ny fahasalamam-bahoaka Atsinanana, ny faran’ ny herinandro teo. Distrika 4 no nisitraka izany dia Brickaville, Vatomandry, Antanambao manampotsy ary Marolambo. Niarahana tamin’ny tetikasa USAID/Access ny atrikasa fiofanana.
Nisy ny fifaninanana tantara an-tsehatra amin’ ny teny frantsay nokarakarain’ny minisiteran’ny Fanabeazam-pirenena. Sangany tamin’izany ka nahazo ny laharana voalohany ny Lycée jules Ferry. Faharoa kosa ny Lycée Mixte Antsiranana ary fahatelo ny Lycée Ambalakely Lalangina.
Nanolotra kojakoja ara-pahasalamana ho hampiasaina eny amin’ny hopitaly lehibe ny masoivohon’i Chine, ny faran’ny herinandro teo. Nahitana concentrateur d’oxygène izay mbola tena ampiasaina amin’izao fotoanan’ny ririnina maha be ny aretin’ny taovam-pisefoana izao. Teo koa ny fitsapana hafanana, fitaovana fiarovana ho an’ny mpitsabo…
Nisitraka fitsaboana maimaimpoana tao amin’ ny CHUA manara-penitra Andrainjato ireo olona tra-doza vokatry ny lozam-pifamoivoizana niseho tany Befeta, lalana mankany Isorana, ny sabotsy teo. 24 ireo noraisina an-tanana ka nampiasana ny “fond d’urgence” avokoa, araka ny fanazavana nentin’ny minisiteran’ny Fahasalamam-bahoaka.
French