“Manao ny lalaon’ny Nosy isika amin’izao fotoana izao. Manainga ny rehetra mba hajanony aloha re ny disadisa rehetra izay azo ajanona”, hoy ny minisitry ny Fiarovam-pirenena, ny jeneraly Rakotoarijaona Josoa, taorian’ny nandraisany ny ambasadaoron’i Torokia, teny Ampahibe, afakomaly. Fitaratra iray ngezabe ny lalaon’ny Nosy itarafan’ny olona an’i Madagasikara sy ny vahoaka malagasy. Voninahitra ho an’ny rehetra izany, na inona na inona firehana misy ny tsirairay. Mangataka fiatoana politika amin’ izao lalaon’ny Nosy izao izy mba ho voninahitr’i Madagasikara sy ny vahoaka malagasy. “Ajanony re ny adilahy politika, fa izay mahasoa ny firenena amin’izao lalaon’ny Nosy izao, izay andro vitsivitsy fotsiny”, hoy ny fangatahany.
“Tsy fanajan-dalàna ireny, ary tsy fanajana ny vahoaka malagasy sy ny fiandrianam-pirenena. Indrindra fanaovana tsinontsinona ny Tafika eto an-toerana…”, hoy kosa izy momba ny fisian’ny mpianatry ny oniversite nilanja sainam-pirenena vahiny teny Ankatso, tamin’ny hetsi-pitakiana nataon-dry zareo. Tena tsy azo ekena ary mamoafady ny toy ireny. Tany sy fanjakana tan-dalàna sy mahaleo tena i Madagasikara. “Aoka tsy horaviravezan’ny zavatra hafa isika, indrindra ny tanora. Antsika mianakavy i Madagasikara”, hoy izy.
R. Nd.
French