Tsara ny tombana tamin’ ny fampidirana ny karazan-javamananaina eo amin’ny sehatry ny fambolena eto Madagasikara. Vokatra azo tamin’ny alalan’ny fiaraha-mientan’ny mpisehatra avy amin’ny minisiteran’ny Fambolena sy ny fiompiana, ny minisiteran’ny Tontolo iainana sy ny fandrosoana lovainjafy ary ny minisiteran’ny Jono sy ny toekarena manga. Nisy ny atrikasa nahafahan’ireo mpiantsehatra fototra nanamafy ny traikefany momba ny foto-kevitra, natao tetsy amin’ny Carlton, afakomaly. Tafiditra ao anatin’ny zana-pandaharanasa ny fampidirana ny karazan-javamananaina eo amin’ ny sehatry ny fambolena. Manampy amin’ny fitadiavana vahaolana manoloana ny fahapotehan’ny tontolo iainana izy ity. Tanjona ny hanomezan-danja ny karazan-javamananaina amin’ny fomba mirindra ny eo amin’ny lafiny politika sy teknika ary ny sehatry ny fambolena. “Natao ity atrikasa ity hampahatsiahivana ny mpiantsehatra rehetra ny anjara andraikitry ny tsirairay hitantana maharitra ny zava-boahary noho ny fiovaovan’ny toetr’ andro”, hoy ny minisitry ny Jono sy ny toekarena manga, Mahatante Paubert.
Nahafahana namaritra fanamby sy ireo tokony mbola hohatsaraina ny fihaonana. Samy nandroso soso-kevitra ho an’ny politika nasionaly sy ny paikadim-pirenena manaja ny tontolo iainana sy ny zava-boahary ny mpisehatra samihafa. Manana anjara toerana lehibe eto Afrika sy maneran-tany ny karazan-javamananaina eto Madagasikara.
Henintsoa Hani
French