Namoaka tatitra ny Banky Iraisam-pirenena. Aminy, tsy ho tratra ny tanjona napetraka ho an’ny Tanjon’ny fampandrosoana maharitra (ODD) apetraky ny Firenena Mikambana mikasika ny rano fisotro madio. Raha ny antontanisa navoakan’ny Banky Iraisam-pirenena, manodidina ny 1,6 miliara ny olona tsy manana rano fisotro madio hatramin’ny taona 2030. Miisa 2,8 miliara tsy manana toeram-pidiovana ary 1,9 miliara ny olona tsy manana fitaovana fanasan-tanana.
Ho an’ny Banky Iraisam-pirenena, ilaina ny fampiasam-bola, ny fikarohana zava-baovao, ny fanomezam-baovao ary ny fametrahana rafitra mahomby, raha tiana ho tratra ny tanjona. Mila hamafisina, noho izany, ny ezaka. Nisy fivoriambe natao tany Stockholm Soeda, ny 20 hatramin’ ny 24 aogositra teo, nandinihina ny paikady tokony hahitsy.
220 tapitrisa dolara
Ho an’i Madagasikara, mahatratra 220 tapitrisa dolara ny famatsiam-bola avy amin’ny Banky Iraisam-pirenena, ao anatin’ny Tetikasa fanatsarana ny fahazoana rano fisotro (PAAEP). Anisan’ny hatao laharam-pahamehana ny any amin’ny tapany atsimo. Hatreto, ny 54,4%-n’ny Malagasy ihany no mahazo rano fisotro, ary ny 12,3% no manana fidiovana. Anisan’ireo firenena 76 andalam-pandrosoana vitsy ny mponina manana rano fisotro i Madagasikara.
Njaka A.
French