Manome vahana ny tanora malagasy ny WWF, amin’ny fiarovana ny tontolo iainana sy ny zava-mananaina. Tohanana izy ireo, mba hanana fahaiza-mitarika eo amin’ny fiarahamonina.
Araka ny antontanisa navoakan’ny rafitry ny Firenena Mikambana misahana ny mponina (UNFPA), latsaky ny 25 taona ny 2/3-n’ ny Malagasy (64%). Latsaky ny 15 taona ny antsasaky ny mponina (47%). Tokony ho fanoitra hitondra fampandrosoana ny fisian’ireo.
Manome lanja manokana ny tanora, noho izany, ny fikambanana iraisam-pirenena miaro ny tontolo iainana, ny WWF Madagasikara. Tanjona ny hahafahan’izy ireo manome vaovao, manabe ary manentana ny mpiara-belona hiarovana ny tontolo mananaina tsy misy afa-tsy eto Madagasikara. Hanentana ny tanora toa azy ireo, mba ho hitarika amin’ ny fanovana. Eo koa ny fanomezan-danja ny fandraisana anjara, ny fahaiza-mihaino ary ny fahavononan’ny tanora handray andraikitra mba hisian’ny fiarovana ny tontolo iainana maharitra.
Araka ny WWF, maro anefa ny ezaka mila hatao hanatanterahana ireo. Tsy ampy ny fari-pahalalana amin’ ny fanabeazana, ny fandraisana fanapahan-kevitra, ny traikefa sy ny maha matihanina, sns. Eo koa ny fahantran’ny mponina eny ifotony sy ny firenena.
Fiofanana tany Toliara
Manoloana ireo, nanapa-kevitra ny WWF Madagasikara hampiofana ny tanora amin’ny alalan’ny tetikasa “WWF Youth Community”. Manohana azy ny WWF any Soisa, ahafahan’ny tanora mivelon-tena, ho afaka miasa maharitra, mifampizara amin’ny mpiara-monina. Nisantarana izany ny tontolo an-tanety sy an-dranomasina Mahafaly, any amin’ny faritra Atsimo Andrefana. Nanomboka tamin’ny 27 hatramin’ny 30 avrily 2023 tany Toliara ny fiofanana ho an’ny tanora miisa 10.
Maromaro ny lohahevitra noraisina, toy ny fomba fanovana ny toe-tsaina, ny fijery, ny kolontsaina, ny fandraisana fanapahan-kevitra, ny fitantanana, ny fanabeazana, ny fikarohana zava-baovao, ny fampiasana sy ny fampivelarana ny talenta, sns.
Njaka Andriantefiarinesy
French