Manana fomba fitondrana tsara lavitra noho ny an’ny vahiny ny Malagasy, ary tena nahomby ny fampiharana izany fahiny, araka ny nambaran-dRanaivoson Désiré, filohan’ny antoko Marina na Manapa-kevitra iombonana ho an’ny fampandrosoana. Nijoro nanomboka ny taona 2015 ny antoko saingy somary nangina noho ny fandaminana anatiny sy ny zava-misy teto amin’ny firenena. Ainga vao kosa no hoentiny ho an’ny firenena ao anatin’izao fiverenany izao, raha ny voalazan’ny filohan’ny Antoko.
Antoko politika nanana rafitra nanerana an’i Madagasikara ity Antoko ity, ary efa nandray anjara tamin’ny fifidianana natao ny taona 2018 sy ny fifidianana loholona ny taona 2015, teto amin’ny faritanin’Antananarivo. Fiarahana manapa-kevitra sy ny demokrasian’ny fandraisan’anjara no fotokevitra voiziny. “Tsy ampy ny fametrahana olom-boafidy fa tokony hampandraisina anjara amin’ny raharaham-pirenena ny olom-pirenena”, hoy ny filohan’ny antoko Marina. Ny fiverenana amin’ny soatoavina sy ny kolontsaim-pitondran-tena malagasy no hitondrana ny firenena. Efa nisy izany fanjakana tsara tantana izany teto Madagasikara saingy nariantsika sy natakalontsika ny an’ny vahiny.
Antoka lehibe hampahomby ny fitantanana ny firenena ihany koa ny fampiharana ny tena fihavanana sy ny firaisan-kina. Fifanarahana hifaneken’ny fiarahamonina ny fihavanana ka izay tsy manaraka izany dia voahilika tsy ho isan’ny fiarahamonina, araka ny nambaran-dRanaivoson Désiré.
Lin
French