Zazavavy telo volana narian-dreniny an-kolaka teny Ambohimamory-Itaosy, omaly. Napetrany tamin’ ny zazavavy 12 taona io zanany io. Nilaza hiantsena vetivety izy kinanjo tsy niverina intsony. Nidina ifotony nijery ny zava-nisy ny zandary ao an-toerana rehefa naharay fampandrenesana.
Fiara nanitsaka olona iray nifandrimbonan’ny fokonolona nosakanana tetsy Anosizato, omaly. Nikasa handositra niaraka ny fiara ny mpamily ka niray saina nanajanona azy ny fokonolona. Nandamina ny toe-draharaha ny mpitandro filaminana.
Niharan’ny firehetana ny tranon’ny mpianatra tao amin’ny B5 anatin’ny Campus Universitaire Barikadimy-Toamasina, omaly hariva. Tsy nisy olona tao amin’ny efitrano iray. Tsy fantatra mazava ny nitarika ny haintrano saingy kila avokoa ny entana rehetra tao amin’ny efitra iray. Niara-nisalahy namono ny afo ireo mpianatra manodidina.
Mpampanofa tena nahatraran’ny mpitandro filaminana vola sandoka mitentina 1 420 000 Ar tao Ambondromamy, ny herinandro lasa teo. Nilaza ho voasolokin’ny olo-tsy fantatra izy. Nampiahiahy ny mpitandro filaminana anefa ny fihetsik’io ramatoa io ka nosavaina ny tranony. Tratra ny vola sandoka 20 000 Ar miisa 71.
French