Nahafahana nanombana ny ezaka natao tao anatin’ny fanantanterahana ny teti-pivoarana ho an’ny fanabeazana (PSE 2018-2023) ny atrikasa « revue thématique ».
Natomboka ny taona 2017 ny PSE, ho fanatsarana ny rafi-pampianarana eto amintsika manomboka eny amin’ny akany fibeazana hatramin’ny fampianarana ambony.
Nikarakara ny atrikasa ny fihanaomben’ny mpisehatry ny fanabeazana (PNPSE), nahafahan’ny olona maherin’ny 500 nandray anjara tamin’ny endrika ampitain-davitra sy mivantana ho an’ny mpivory 160, teto Antananarivo, nandritra ny roa andro. Voasolo tena tao avokoa ireo mpisehatra amin’ny fanabeazana, nahitana ny minisitera telo voakasika, ny firaisamonina sivily ary ny mpanohana ny fanabeazana.
Nisy ny fifampidinihana teo anivon’ny PNPSE ary nahafahana nitazona ireo lohahevitra maromaro amin’ny fifanakalozan-kevitra eo amin’ny fiarovana ny miralenta amin’ny rafi-pampianarana sy ny fanabeazana mampiaty eto Madagasikara, fandaminana ny tambajotran’ny sekoly teknika sy ny oniversite. Eo koa ny fanapariaham-pahefana, fanombanana ny rafitra andrimpanjakana hitantana ny sehatry ny fampianarana, faharetan’ny rafi-panabeazana, manoloana ny fikorontanan’ny toetr’andro.
Tanjona ankapobeny ny famaritana sy famakafakana ny fomba fampiharana ny fanavaozana ankehitriny, mifanaraka amin’ny laharam-pahamehana nasionaly efa nataon’ny governemanta sy ny mpiara-miombon’antoka. Tanjona manokana ny hifampizarana traikefa, hiantohana ny firindran’ny paikady amin’ny laharam-pahamehana eto amin’ny firenena, ny fandraisana fanapahan-kevitra tsara ary ny fanamarinana ny lohalaharana amin’ny drafitrasa ho an’ny taona 2030, amin’ny alalan’ny LOSEM sy ny fiaraha-miasa eo amin’ny sehatry ny fanabeazana.
Vonjy A.
French