Kila tanteraka tsy nisy noraisina ny fiara taxi nirehitra teo amin’ny toeram-piantsonana akaikin’ny fiangonana Katolika Ambanidia, omaly. Voalaza fa olana tao amin’ny moteran’ny fiara no nitarika ny firehetana. Tonga teny an-toerana namono ny afo ny teo anivon’ny Sampana mpamonjy voina.
Naratra mafy koa ny mpitondra moto iray nifandona tamina fiara 4×4, teny By-Pass, omaly maraina. Nahitana fahasimbana ilay moto sy ny fiara nifandona taminy. Fiara iray hafa koa nivadika teny amin’ny lalam-baovao Rocade. Vokatry ny fandehanana mafy no nampivadika ity fiara ity rehefa tsy nahafehy ny familiana intsony ny mpamily.
Naiditra am-ponja omaly rehefa avy natolotra ny fampanoavana ireo jiolahy tompon’antoka tamina halatra omby tao Ambodisiarivo, Ambohimanga Rova. Henon’ny tompon-trano namoha ny valan’ombiny ireo jiolahy, ny sabotsy alina teo. Lasa nitsoaka ry zalahy saingy nanohy ny fikarohana ny zandary sy ny andrimasom-pokonolona ka izao tratra izao.
Lasan’ny mpaka an-keriny tao amin’ny fokontany Antanimafy, kaominina Morarano Chrôme, distrikan’Amparafaravola, ny talata alina teo, ireo raim-pianakaviana roa. Tao amina tokantrano roa mifanakaiky no nakan’ny jiolahy azy ireo. Mandeha ny fanarahan-dia ataon’ny zandary any an-toerana.
French