Nanolotra fitaovam-pianarana ho an’ny mpianatry ny EPP Volavy Gara eny Manjakandriana ny fikambanana Rotary Club Antananarivo (RCA) Vovonana. Nanatanteraka izany ny filohany, Randrianarisoa Malalatiana, niaraka tamin’ny mpikambana vitsivitsy, toa an-dRaketamanga Lalao, efa filoha teo aloha.
Niisa 100 ny ankizy nisitraka ny fanampiana, ka ao amin’ny kilasy T5 izay hanala fanadinana CEPE ny 27, ary ankizy mendrika tamin’ny taom-pianarana 2022-2023 ny 63 ambiny. Fitaovam-pianarana toy ny kitapo, kahie, stylo, pensilihazo ary fitsipika, no nomena azy ireo.
Nomena tombon-dahiny, nahazo akanjo mafana ireo mpianatry ny T5. Nankasitraka izao fanampiana izao ny talen’ny EPP Volavy, Randrianarimanana Hanta, fa vao maika hamparisika ny ankizy hazoto hianatra. Efa nahatratra 91% ny taham-pahafahana CEPE tao amin’ity sekoly ity tamin’ny taona 2022-2023.
Efa nisy ny hetsika iantohana ny fahasalamana ho an’ny ankizy miisa 65 ao amin’ny toby Le Triomphe eny Ambohimangakely, ny volana jolay teo. Nanome jiro mandeha amin’ny herin’ny masoandro ho an’ny fikambanana Vonona sy ny CSB II any Manalalondo, distrika Arivonimamo kosa ny volana aogositra. Any Ambohimanambola indray amin’ny volana oktobra ho avy izao.
Njaka A.
French