Tratra niditra an-tsokosoko tao an-tranon’olona eny Namontana ny jiolahy iray. Ny sabotsy maraina teo izy no tsikaritry ny tompon-trano niditra tao an-tranony. Efa saika haka findain’olona tao an-trano izy tamin’io fotoana io. Nosamborina avy hatrany taorian’izay. Tonga ny polisy naka azy nihazo ny kaomisarian’ny CSP5.
Olona iray namoy ny ainy raha efatra kosa ireo mbola tadiavina. Io no vokatry ny faharendrehan’ilay lakana nitondra mpandeha tao Amboanato, Nosy Varika Mananjary, ny sabotsy maraina teo. Nifampisongona tamina lakana iray teo aloha ity lakana ity. Nisy ny fifampikasohana ka vaky ny lakana ary niafara tamin’izao famoizana ain’olona izao. Simba avokoa ny entan’ny mpandeha.
Potika avokoa ireo fiara roa nifandona teny Analakely, omaly atoandro. Fiara tsy mifidy lalana no nifandona tamina fiara iray hafa. Mafy ny fifandonana satria rava ny lohan’ny fiara. Fandehanana mafy no voalaza fa nahatonga ny loza. Maro anefa ireo olona nifamezivezy teny an-toerana. Tsy nisy ny aina nafoy.
Renoky ny torimaso ny mpandeha taxi-be iray tao anaty 114 omaly atoandro. Hataraina ny azy rehefa tonga teo Ambohimanarina fa tsy hitany intsony ny poketrany misy vola sy finday. Teo Andraharo no tadidiny fa nisy olona nipetraka teo akaikiny. Ranomaso sisa ny an’ity renim-pianakaviana ity.
French