Paikady mampitombo ny famokarana ny fanamboarana sy fanarenana lemaka. Tombanana hitombo hatrany amin’ny 6 300 t isan-taona ny voka-bary azo ao amin’ny lemaka voatondraka, Beboka.
Misesisesy ny fanamboarana fotodrafitrasa samihafa hampiroboroboana ny famokarana mba hahatrarana ny fahavitan-tena ara-tsakafo eto Madagasikara. Ankehitriny, vita ny 94% amin’ny tohodrano Beboka ao amin’ny distrikan’ Antsalova, faritra Melaky. Tohodrano anisan’ny hanampy ny famokarana any an-toerana sy ho tombontsoan’ny mpamokatra. Tanjona ny hahazoana vary akotry fanampiny hatrany amin’ny 6 300 t isan-taona. Tantsaha mpamboly maherin’ny 1 000 no hisitraka ny fotodrafitrasa, ao anatin’izay ireo fikambanana mpampiasa ny rano miisa efatra sy federasiona iray. Velarantany 50ha monja no novolen’ireo mpamboly tao amin’ny lemak’i Beboka nandritra ny taona maro noho ny tsy fahampian’ny rano hanodrahana. Ho afa-pahasahiranana avokoa ny tantsaha aorian’ny fahavitan’ny tohodrano. Fotodrafitrasa notontosain’ny minisiteran’ny Fambolena sy ny fiompiana, tamin’ny alalan’ny tetikasa ho fampandrosoana ny faritra Menabe sy Melaky (AD2M), izay vatsian’ny tahirim-bola iraisam-pirenena ho an’ny fampiroboroboana ny fambolena (FIDA) vola.
Hitombo ny vokatra
Mivelatra ka afaka manondraka velarantany hatrany amin’ny 1 600ha amin’ny taom-pamokarana ho avy ny tohodrano. Hanampy hatrany amin’ny 500 ha amin’ireo voly avotra ihany koa izany. Ankoatra izay, nahafahana nanondraka tanimbary 115ha ny lemak’i Namatoana ao amin’ny kaominina Antanifotsy, distrika Soanierana Ivongo. Manodidina ny 345 t ny vokatra andrasana ao an-toerana. Raha toa ka vary 180 t ny voka-bary andrasana ao amin’ ny lemaka Sahasoa. Tanjona ny hampitombo ny vokatra sy hahatsara ny fari-piainan’ny tantsaha, ialana amin’ny fanimbana ny tontolo iainana.
Henintsoa Hani
French