Fatin-dehilahy iray hitan’ny fokonolona natsingevan’ny ranon’Ikopa teo ampitan’ny Gare routière Makis, omaly atoandro. Natopatopan’ny rano ka tsikaritry ny manodidina ny fisian-javatra hafahafa. Nanamarina izany ireto farany kinanjo tena olona ary efa tsy nisy aina intsony ity hita ity.
Dahalo iray matin’ny fitsaram-bahoaka tao Antsampandrano, Iandratsay, fokontany Ampahatrimaha, kaominina Mandritsara, distrikan’i Betafo, ny 29 septambra teo. Nangalatra omby ny dahalo telo lahy. Nifanenjehan’ny fokonolona izy ireo ka tratra. Voadaroka mafy ny iray ka nitarika tamin’ny famoizan’aina.
Mpangalatra voritsiloza voasambotry ny zandary tao Ambohimanoa, Sabotsy Ambohitromby, ny alahady 1 oktobra teo. Nentiny nihazo ny tsena ireo vorontsiloza telo nangalariny ka noraisim-potsiny izy sy ny entana halatra. Nentin’ny zandary natao famotorana io mpangalatra io. Naverina tamin’ny tompony ireo vorontsiloza halatra.
Olona roa nanimba fananana iombonana tra-tehaky ny mpitandro filaminana tao Antsofinondry, kaominina Sabotsy Namehana, ny faran’ny herinandro teo. Nitondra fiara roa samy hafa izy mirahalahy ka nandona ny vy amin’ny arabe. Naiditra am-balam-pamonjana ny fiara nentin’izy roa lahy.
French