Norobain’ny jiolahy dimy lahy ny vola mitentina 36 tapitrisa Ar tao Avaratsena, Tsiroanomandidy, ny alatsinainy teo. Nihanika lavarangana ireo olon-dratsy ka niditra an-keriny tamin’ny varavarana tao ambony rihana. Nitifitra ireo mpivady tompon-trano avy hatrany ireto farany. Lasa ny vola.
Fatim-behivavy iray hitan’ny fokonolona tao Ankadinondry Sakay, omaly maraina. Efa potika tsy nisy namantarana azy intsony ny endriny. Rovidrovitra ihany koa ny akanjony. Nidina nijery ifotony ny zava-nisy ny mpitandro filaminana ka misokatra ny fanadihadiana.
Telo lahy nangalatra kisoa tra-tehaky ny zandary tao Ambatolampy an-tampon-tanàna, omaly. Mamaky trano sady mangalatra kisoa izy telo voasambotra ireto. Tratra teny amin’ny iray ny rongony tamina fonosona nilanja 320 g. Naverina tamin’ny tompony kosa ilay kisoa.
Maty namono tena nitsoraka tao ambany kamiaobe tao Vatofotsy Antsirabe, omaly tolakandro, ny miaramila zazavao iray. Nitaraina ho narary izy ka niresaka tamin’ireo ray aman-dreniny fa hiala tsy hanao miaramila. Tsy navelan’ireo ray aman-dreniny hiala anefa izy ka izao nisafidy ny hamono tena izao. Naratra mafy izy ka antony nitarika ny fahafatesany.
French