Efa tsy nisy aina intsony no hitan’ny fokonolona manamorona ny lalam-pirenena fahefatra ny “proviseur” an’ny lisea iray anatin’ny distrikan’Ambohidratrimo, ny zoma 13 oktobra teo.
Nahitana tsatok’antsy maromaro ny vatany. Tsindron’antsy miisa enina sy daroka tamin’ny loha no namonoan’ny olon-tsy fantatra ny “proviseur” iray tao Ankarefo, fokontany Ambohimiadana, kaominina Ampanotokana, distrika Ambohidratrimo, ny faran’ny herinandro teo. Nahita olona nitsirara teo amin’ny sisin-dalana, 10 m miala ny lalam-pirenena faha-4 ireo olon-tsotra nandalo. Vatan-dehilahy efa mitsirara sady mihosin-dra io hitan’izy ireo io ka niantso ny mpitandro filaminana avy hatrany ireto farany noho ny trangan-javatra hafahafa. Nidina ifotony nanamarina ny tena zava-nisy ny teo anivon’ny zandarimaria sy ny solotenan’ny mpitsabo ao amin’ny CSBII Ampanotokana. Tonga ihany koa ny fianakavian’ilay namoy ny ainy. “Efa novonoina teo amin’ny 12 ora mialoha izao nahitana ny vatana mangatsiaka izao io lehilahy io” , hoy ny mpitsabo. Novelesina tamin’ny zavatra koa ny lohan’io lehilahy io.
Taratasin’asa…
Lasan’ny olon-dratsy izay nahavanona io vono olona io ny kitapo teny amin’io tomponandraikitra voalohan’ny lisea io, araka ny nambaran’ny havana akaiky azy. Nisy ny taratasin’asa, niampy ny karapanondrom-pirenena an’io maty io izany. Mbola teny aminy kosa ny findainy ary tavela teny amin’ny dimy metatra miala amin’ny vatana mangatsiakany ny ilan-kirarony. Nandray an-tanana ny fanadihadiana avy hatrany ny zandarimaria. Efa natolotra ny fianakaviany taorian’ny fizahana azy ilay maty.
Tsiferana R.
French