Dahalo efa-dahy maty voatifitry ny zandary tao amin’ ny fokontany Bekoky, kaominina Bekodoka, distrikan’i Besalampy, afakomaly. Nifanena tamin’ny dahalo efatra mirahalahy nitondra omby halatra ny zandary roa lahy, tamin’ny 4 ora maraina. Nofotompotorina ireto olon-dratsy ka niaiky fa omby halatra ireto tratra teny aminy ireto. Nentina hihazo ny biraon’ny zandary, araka izany, izy efa-dahy. Nangataka hivalan-drano ny telo lahy ary nilaza ho narary kibo ny iray. Nikasa handositra tamin’ io fotoana io izy efatra. Raikitra ny fanenjehana nataon’ny mpitandro filaminana. Nikiry nanao tongotra an-katoka ireo dahalo. Nampitandrina tamin’ny alalan’ny tifi-danitra ny zandary saingy nanda hatramin’ny farany ireo dahalo. Vokany, maty voatifitra avokoa izy efa-dahy. Naiditra am-balam-pamonjana kosa ireo omby telo sarona teny amin’izy ireo.
Tsiferana R.
French