Fihariana isan’ny mahasarika ny olona ny fiompiana trondro noho izy mora karakaraina, tsy mandany vola saingy mampidi-bola.
Be mpitady sy be mpanontany ny trondro an-tanimbary sy trondro an-dobo eto amintsika. Tsy ampy anefa ny tolotra satria ambony ny filàna.
Mora karakaraina ny trondro raha oharina amin’ny fiompiana hafa izay mitaky fepetra samihafa. Na izany aza, mitaky fanaraha-maso sy fahadiovana ny dobo trondro mba hampiroborobo ny famokarana.
“Arakaraka ny haben’ny dobo ny isan’ny zanatrondro arotsaka ao anatiny. Manodidina ny 10 eo ny zanatrondro tilapia na karpa azo arotsaka ao anaty dobo 1m3. Latsak’ izay kosa raha toa ka trondro mifangaro satria izy hitombo isa”, hoy ny fanazavan-dRatsiferason Christophe avy ao amin’ny office parc. Milanja 350 g ny zanatrondro tilapia eo amin’ny dimy na enim-bolana eo. Mitombo isa haingana vetivety kosa ireo tilapia mifangaro raha toa ka manodidina ny 100-150g eo ny lanjany eo amin’ny fahenimbolany, hoy hatrany ny fanazavana voaray. Manodidina ny 500-600g eo kosa ny lanjan’ny karpa enim-bolana. Nambarany fa mahatrata 1 kg mahery kosa izy raha ajanona anaty dobo mihoatr’izay fotoana izay. Ankilan’izay, mahalany provandy 1 kg eo ny trondro mandra-pahalehibeny. Mety hitombo kosa anefa ny filàny arakaraka ny hijanonany anaty dobo.
Fikarakarana
Ilaina ny fikarakarana ny dobo mialoha sy mandritra ny fotoam-pamokarana. Toy izay koa ny fitiliana sy fanaraha-maso tokony hatao ary ny fanamboarana sy fikarakarana ireo sakafon’ny trondro. Ilainy ny fanarahana ny toromarik’ireo teknisianina hampirindra sy hampahomby ary hampiroborobo ny famokarana. Marihina fa tadifitra anatin’ny vanim-potoana fikatonan’ny fanjonoana isika izao. Trondro an-dobo sy an-tanimbary no betsaka hita eny an-tsena amin’izao fotoana izao.
Henintsoa Hani
French