TARATRY ny KANTO

Boky ho an’ny ankizy. Hivoaka amin’ity volana novambra ity ilay boky « Amboarana angano/Recueil de contes », 92 pejy. Boky mirakitra angano miisa 5 voasoratra amin’ny fiteny malagasy sy fiteny frantsay. Asa soratr’i Arikaomisa Randria, ravahin’i Max Razafindrainibe amina sary nataon-tanana. Manampy indrindra amin’ny fampiainana ny angano ireo sary ireo.
« ADMC- CRAAM 10 Taona ». Mankalaza ny faha-10 taonany ny “Centre de ressources des arts de Madagascar” CRAAM, ivontoerana mampiroborobo ny haikanto sy ny kolontsaina eny Ankatso. Fampiran­tiana hosodoko sy sary, dihy sy fampisehoana poezia ary fampisehoana iarahana amin’ny mpahay kanto mpihira, noentina manamarika izany.
Leo Marilier. Hitohy anio ny fampisehoana, anehoan’i Leo Marilier, mpitendry lokangam-bazaha ny traikefany, eny amin’ny IKM Antsahavola. Miara-miasa amin’ny Madagascar Mozarteum, ity vahiny mpahay kanto ity manao izao seho izao eto amintsika. Raha tsiahivina, efa nisy ny fampisehoana nataony ny alahady teo, teny amin’ny IKM Antsahavola.
« Expo. Photo Anthotype ». Tanterahina eny amin’ny Aft Andavamamba, ny 8 hatramin’ny 30 novambra 2023, ny fampirantiana nampitondraina ny lohateny hoe “La Photographe à la Chlorophylle”. Araka izay anarany izay, sary amin’ny ravinkazo no hita mandritra ity hetsika ity. Hisy ihany koa ny atrikasa iarahana amin-dRamanahadray Fidison mandritra ny hetsika.