Miverina indray ny fanapahan-doha ao amin’ny faritr’Ihorombe. Raim-pianakaviana iray hita faty tao Antamenaka, distrikan’Ihosy, omaly.
Raim-pianakaviana iray no novonoina tamin’ny fomba feno habibiana tao amin’ny toerana misy ny fasam-bahiny ao Antamenaka, distrikan’Ihosy, omaly maraina. Olona handeha hanati-boninkazo no nahatsikaritra zavatra hafahafa. Lehilahy iray nitsirara tamin’ny tany ary efa tsy nisy loha intsony. Niantso ny mpitandro filaminana sy ny mpitsabo avy hatrany hijery ny zava-nisy ireo nahita ny razana. “Tsy hita ny lohan’io rangahy io”, hoy ny loharanom-baovao any an-toerana. Avy any Ambatolampy saingy mipetraka ao Ihosy miaraka amin’ny vady aman-janany ity lehilahy ity. Natsipin’ireo nahavanon-doza tao anaty kirihitra ny fatiny. Mbola nisy nahita nisotrosotro toaka tao an-tanàna izy ny alin’ny alarobia teo. “Tsy misy azo ambara fa anatin’ny fanadihadiana tanteraka izahay eto anivon’ny polisim-pirenena amin’izao fotoana”, hoy ny nambaran’ny kaomiseran’ny polisy ao Ihosy.
Miseho lany…
Andrasana ny tohin’ny fanadihadian’ny mpitandro filaminana ao an-toerana. Tsiahivina, olona telo nidoboka am-ponja vokatr’io raharaha fanapahan-doha io tao Ihosy, ny volana jolay lasa teo. Niseho lany io tranga famonoana olona io nanomboka ny volana mai teo. Voakasik’izany ny fahitana fatin’
olona tao Tanambao Ranohira, Manombo, Somatasy sy Ihosy tampon-tanàna. Nanokatra fanadihadiana lalina ny polisy sy ny zandary nanomboka ny volana jolay teo. Nangingina ny raharaha fanapahan-doha saingy niverina indray izany, roa volana aty aoriana.
Tsiferana R.
French