Sehatra iray anisan’ny miantoka ny fampandrosoana ny firenena ny fampiroboroboana ny fizahantany. Mandray anjara amin’ny “word travel market” atao any Londres i Madagasikara, amin’ny alalan’ny Ofisim-paritry ny fizahantany ao Nosy Be.
Andro fahatelo sady farany amin’ny “Salon Word travel market (WTM) London 2023” any Excel, anio. Anisan’ny mandray anjara amin’ity foara ity i Madagasikara. Hita any an-toerana ny ofisim-paritry ny fizahantany ao Nosy Be, mampahafantatra ny Nosy malagasy fa indrindra amin’ny fampiroboroboana ny sehatry ny fizahantany. Foara goavana mampiray ny firenena maro maneran-tany ny hetsika WTM entina hampahafantarana ireo toerana miavaka sy tsara tsidihina ary hialana sasatra. Fotoana ihany koa hanararaotan’ireo mpandraharaha hikarohana mpiara-miombon’antoka. Seha-pihariana mifandray sy mifanampy amin’ny fampandrosoana maharitra an’i Madagasikara ny fizahantany.
Ankehitriny, vao manomboka miarina ity sehatra ity taorian’ny covid-19. Tanjona rahateo ny hahatrarana 1 000 000 mpizahatany amin’ny taona 2028. Manodidina ny 157 368 ireo mpizahatany tonga teto Madagasikara nandritra ny sivy volana voalohan’ity taona ity, araka ny antontanisa navoakan’ny minisiteran’ny Fizahantany. Ny volana septambra teo, miisa 22 975 ireo mpizahatany tonga teto Madagasikara. Nitombo 9 000 isa izany raha oharina tamin’ny volana septambra tamin’ny taon-dasa.
Fihaonana
Nandray anjara tamin’ny hetsika “World travel and tourism council (WTTC) Global Summit 2023” tany Kigali Rwanda, ihany koa i Madagasikara, ny 1-3 novambra teo, tamin’ny alalan’ny Confédération du tourisme de Madagascar (CTM).
Nisolo tena ny firenena malagasy ny filoha lefitry ny CTM, Razafimahefa Tojo, sy ny tale mpanatanteraka, Ratovomalala Lova. Lohahevitra noresahina nandritra izany ny fomba fampiroboroboana ny fizahantany taorian’ ny Covid-19.
Henintsoa Hani
French