Nivory ny 15 novambra teo ny mpikambana ao anatin’ny Filankevitra mpandrindra ny paikady ho an’ny Tetikasa maika, hanamafisana ny vokatra ara-tsakafo (Purpa). Nankatoavina ny Drafitry ny tetibola hoenti-miasa (PTBA) ho an’ny taona 2024.
Tanjon’ny tetikasa ny hampiakarana ny vokatra sy ny famokarana, mamaly ny filan’ireo orinasa famokaran’ny fianakaviana tantsaha (EAF), sokajy faharoa. Misitraka izany ny tantsaha manana velarantany ambolena latsaky ny 3 000 m2 (30 ara), sady afaka mandoa fandraisana anjara ny 10% amin’ny tohana omen’ny Purpa, mahazo masomboly sy zezika.
Niisa 18 528 ny mpamboly vary an-drano nisitraka ny tetikasa “Purpa” ny taom-pamokarana 2022-2023, ka nahatratra 4,15 t/ha ny salanisan’ny vokatra. Niisa 3 561 kosa ireo mpamboly vary an-tanety, nahazo vokatra 2,09t/ha.
Soja sy voanjo
Ankoatra ny vary, miisa 2 003 ny mpamboly soja nisitraka ny tetikasa, nahazoana vokatra 1,66 t/ha. Nahazo voanjo 1,11 t/ha kosa ny mpamboly niisa 1 550.
Ampiasain’ny tetikasa “Purpa” ny teknolojia niomerika amin’ny fanohanana sy ny fikirakirana ny antontam-baovao ho an’ny tantsaha tohanana. Nozarana karatra niomerika tsirairay ny tantsaha, sady misy ny fiaraha-miasa amin’ireo magazay mpivarotra masomboly sy/na zezika. Manampy ireo, miisa 235 ny toerana sekoly taninketsa andrana ho an’ny tantsaha natsangana tamin’ity taona 2023 ity, manerana ny faritra 20. Vehivavy ny 38% amin’ ireo nisitraka ny Purpa.
Njaka A.
French