Raharaha Andohanimandroseza : fiaram-panjakana ilay voatifitra, tale tao amin’ ny Instat ny iray maty

Miandry ny tatitra ofisialy mahakasika ny fifampitifirana teny Andohanimandroseza ny mpanara-baovao. Tsy mbola misy ny vaovao avy amin’ny mpitandro filaminana. Milaza ny tomponandraikitra fa ana­tin’ny famotorana tanteraka, mandrak’alina.
Etsy ankilan’izay, ny mpikirakira ny tambajotran-tserasera no namoaka fa fiaram-panjakana ilay rotiky ny bala. Ora vitsy taorian’izay, namoaka fa­nambarana ny teo anivon’ny Ivontoerana mikirakira ny an­tontan’isa na ny Instat. Nitafa tamin’ny mpanao gazety ny tale jeneraliny, Ndremi­tsara Tarzan. Nanamafy izy fa an’ ity ivontoerana ity tokoa ny fiara. Notsipihiny anefa fa tsy tompon’andraikitra tamin’izay niseho izy ireo. Tale tao taloha no nitondra izany tsy ara-dalàna. «Fiara efa tokony ho naveriny io», hoy izy. Marihina fa anisan’ny iray maty voatifitra teny an-toerana ilay tale.
Efa fantatry ny fianakavi­an’ny maty avokoa ireo olona voalaza fa jiolahy voatifitra teny Andohanimandroseza, afa­komaly atoandro. Ny zandary izay nanamafy ny maha olon-dratsy azy ireo, ary manana ny horonantsary po­ro­fo nalain’ny fakan-tsary miafina (Camera de surveillance) maro eto an-drenivohitra.
Andrasana, araka izany, ny marina mahakasika ity ra­ha­raha mahaliana ny Ma­la­gasy maro ity.

J.C

Partager sur: