Andohanimandroseza: Adjidà ny iray amin’ireo dimy voasambotra

Tafakatra dimy mianadahy ireo voasambotry ny zandary voasaringotra amin’ny asan-jiolahy tetsy Andohanimandroseza, omaly.

Mpitandro filaminana am-perinasa ny iray amin’ireo olona dimy voasambotra momba ny raharaha tetsy Andohanimandro­seza, araka ny fanazavan’ny kaomandin’ny Vondron-tobim-pileovana Anala­man­ga, ny
Kly Tojo Raolijon, tetsy Ankadilalana, omaly. Anisan’ireo nandray anjara nivantana tamin’ny raharaha maloto nataon’ireo dimy lahy namany izay efa lavo ny talata teo io miaramila io. Ankoatra azy, vehivavy roa sy lehilahy roa hafa voasambotra tao­rian’ny fanadihadiana lalina nataon’ny zandarimaria. “Voasambotra teny akaikin’ny trano fonenany ihany ny sasany tamin’izy ireo”, hoy ny zandary.
Efa mpanao fanafihana miharo fisandohana andraikitra inefatra nifanesy ireto jiolahy ireto. ”Narahi-maso na­nomboka tamin’ny fanafihana nataony teny Anosiala io fiara nentin’ireo jiolahy io, ny 31 oktobra teo”, hoy ny zandary. Nanohy nanao ny asa ratsiny tamin’ny toerana telo samihafa indray ireo jiolahy ny 2, 14 ary 19 novambra. Naharay loharanom-baovao ny zandary ka nanara-dia. Vokany, voatifitra ny dimy lahy tamin’ireo jiolahy. Tafakatra dimy mianadahy kosa ny voasambotra. Ankoatra ny basy dimy,  tratra teny amin’ireo olon-dra­tsy lavo ireo ny fitombokasem-panjakana  sandoka sy volamena an’ny olona izay efa  lasibatr’izy ireo.

Tsiferana R.