Mandroso ny asa fanatontosana ny fangatahana ny fampidiran-jiron’ny Jirama tsy mbola vita, izay efa nahaloa ny tetibidin’ny asa. Mahatratra 16 950 ny fangatahana eo am-pelantanan’ny Jirama manerana ny Nosy. Mandroso ny fanatanterahana ny asa, ka miisa 5 321 ny fangatahana efa tafiditra ny jiro. Any amin’ny faritra ny 2 935 amin’ireo, raha 2 386 ny eto Antananarivo.
Mitohy hatrany izany fampidiran-jiro izany ka nilaza ny tomponandraikitry ny Jirama fa hoezahina ho vitaina mialoha ny faran’ity taona 2023 ity ny 11 629 ambiny. Manentana ny mpanjifa efa nahaloa ny tetibidin’ny asa ny Jirama hanatona ny masoivohony manerana ny Nosy, haka ny tetiandro hampidirana ny jirony.
Marihina fa fampidiran-jiro ho an’ny mpanjifa mahazatra ity voalaza ity. Misy koa ny fampidiran-jiro mora hitsinjovana manokana ny tokantrano sahirana, izay efa mandeha koa ny asa.
Njaka A.
French