Notokanana tamin’ny fomba ofisialy ny sabotsy lasa teo, tetsy Andravoahangy, ny Academy Kids, ivontoerana manabe ireo kilonga amin’ny ping-pong. Notsiahivin-dRaobison Hervé, filoha mpanorina sady efa filohan’ny federasiona teo aloha, fa efa tamin’ ny volana janoary no niasa izy ity. Tanjona ny hanomanana dieny izao ireo ankizy hiatrika ny fiadiana ny ho tompondaka maneran-tany, sokajy U.11 sy U.13. Miisa 100 ireo kilonga beazina ao amin’ny Academy Kids, ankehitriny. Misy sokajy roa ireo ankizy tezaina ao dia ny 2 – 9 taona, vao hanomboka sy hampianarina ny teknika fototra. Eo koa ny 9 – 12 taona, ireo efa mahay kely ka hamafisina ny talentany. Isan’ andro ny fanazarantena, amin’ ny fotoanan’ny fialantsasatra fa ny alarobia sy ny zoma hariva izany amin’ny fotoam-pianarana. Misahana ny lafiny teknika, Ranarison Narcisse, miaraka amin’ireo 5 mirahalahy mpilalao ao anaty ekipam-pirenena malagasy, toa an’i Linoh. Ankoatra ny fanofanana ireo zaza amin’ny ping-pong, hampianarina teny anglisy sy frantsay koa izy ireo. Nanotrona ny lanonana ny filohan’ny federasiona (FMTT), izay nankahery ny ezaky ny Academy Kids. Nanolotra latabatra sy raketa ary “robot lanceur de balle” izy. Nomarihin-dRaobison Hervé fa tsy mikendry ny hiverina hitantana ny federasiona intsony ny tenany fa hisahana ny fikarakarana ireo ankizy sisa.
Torcelin
French