Lehilahy iray sy ny zafikeliny kilan’ny afo ka namoy ny ainy tao an-tranony tao Lakato, distrikan’i Moramanga, ny talata 28 novambra teo. Notafihan’ny jiolahy ny tokantranon’izy ireo ka novonoin’ny tsy mataho-tody tamin’izany ilay rangahy. Nodoran’ny jiolahy ny trano. May nandritra izany ilay rangahy sy ny zafikeliny 3 taona.
Lehilahy iray nahatrarana rongony 3 kilao tao amin’ny fokontany Tsararano, Mahajanga, ny 27 novambra teo. Nataony tao anaty harona plastika ireo entana ireo. Nikasa hivarotra antsokosoko izany ilay rangahy kinanjo nifanehatra tampoka tamin’ny mpitandro filaminana. Nosavain’ny polisy ka tratra ny rongony. Nentina natao famotorana io lehilahy io.
Olon-tsotra iray maty vokatry ny fanafihan-dahalo tao amin’ny Campement Analaiva, Morondava, afakomaly alina tamin’ny 11 ora. Nalain’ireo olon-dratsy ny omby tao am-bala. Niezaka nanara-dia ny fokonolona ka lavo tamin’io fotoana io ny iray tamin’ireto farany. Ankoatr’io, mbola naka omby tao amin’ny vala iray tao Anjaha sy vala iray tao Antanantsoa ireto malaso.
French