Fampandrosoana : manomboka ny fizarana « titre vert »

Dingana goavana amin’ny fampandrosoana ny seha-pamokarana sy hanatrana ny fahavitan-tena ara-tsakafo ary ny fampananan’asa ho an’ny tanora ny tetikasa “titre vert”. Tanora mpamboly 100 mianadahy nisitraka velarantany
200 ha tao amin’ny fokontany Tsi­manariloka, kaominina Itremo, distrikan’Am­batofi­nandrahana, ho an’ny faritra Amoron’i Mania. Lehilahy ny 67% an’ireo tanora nahazo izany raha toa ka vehivavy ny ambiny izay samy eo anelanelan’ny 18 ka hatramin’ny 40 taona avokoa. Ankoatra izay, nomena masomboly voanjo
3 710 kg sy masomboly ka­tsaka 775 kg, NPK 5750 kg ireo tanora. Nanampy izany ny zezika biolojika 17 900 kg ary taho-mangahazo miisa 117 750. Omena lanja sy narindra amin’ny velarantany mano­kana ny fambolena ny mangahazo sy voanjo ary ny katsaka ao an-toerana. Hisoratra amin’ ireto mpamboly ireto kosa ny tany aorian’ny telo taona hampiasany izany ho fiarovana ny fitrandrahany ka hanohizany ny asa famokarana.
Fahaleovan-tena

Miparitaka manerana ny faritra 23 ny fandaharanasa izay mikendry ny fampiroboroboana ny fahaleovan-tenan’ny mpamo­katra, amin’ny alalan’ny famoronan’asa ho an’ny tanora. Ho­tsinjaraina amina tanora mpan­draharaha 93 ny velaran­tany 260 ha ao amin’ny fokontany Ambonarabemahasoa, kaominina Betagnatagna, distrika Melaky, faritra Melaky. Hanajary tany manodidina ny 2,5ha sy biby fiompy isaky ny olona ireo mpisitraka.

Henintsoa H.