Tsy an-kiandriandry, efa any Dubaï ny filoha Rajoelina Andry, ny faran’ny herinandro teo. Niatrika ny fihaonana an-tampony maneran-tany handinihana ny fiovaovan’ny toetr’andro (Cop28) ny tenany. Anisan’ireo nihaona taminy ny sekretera jeneralin’ny Frankofonia (OIF), i Louise Mushikiwabo. Voaresaky ny roa tonta ny fizotry ny fifidianana filoham-pirenena teo sy ny ho fanohizana ny fiaraha-miasa. Anisan’izany ny hanohanana ny fifidianana ben’ny Tanàna sy mpanolontsaina sy ny fifidianana depiote. Eo koa ny hijerena ny sehatry ny fampianarana ambony.
Efa nanomboka ny 30 novambra teo ary hifarana ny 12 desambra izao fihaonana an-tampony Cop 28 any Dubaï, Émirats Arabes-Unis, izao. Manana tranoheva « Pavillon de Madagasikara » ao amin’ ny « Blue Zone » isika. Fitaratry ny fandraisan’andraikitra amin’ny ady amin’ny fiovan’ny toetr’andro. Eo koa ny fifampizarana traikefa, fifanakalozana momba ny lohahevitra maro.
Voaasa manokana
Tsara ho marihina anefa, tsy mbola nitondra delegasiona ofisialy ny filoha Andry Rajoelina. Olon-tsotra, vahiny nasaina manokana fotsiny izy noho ny ezaka goavana vitany mahakasika ny fiarovana ny tontolo iainana syn y ady amin’ ny fiovaovan’ny toetrandro. Ho fanajana ny andininy faha 48 amin’ny Lalampanorenana dia tsy maintsy miandry ny lanonam-pianianana amin’ny fomba ofisaly izy vao afaka manao izany. Fihanianana manamarika ny fandraisany ny fitondrana ho amin’ny dimy taona manaraka.
Misolo-tena an’i Madagasikara any an-toerana ny minisitry ny Fitaterana sy ny famantarana ny toetr’andro Ramonjavelo Valerie sy ny ben’ny Tanànan’Antananarivo, Andriantsitohaina Naina. Manampy azy ireo ny minisitry ny Tontolo iainana, Vina Marie Aurelie, sy ny filoha mpisolo toerana eo anivon’ny Antenimierandoholona, Rabemananjara Nicolas miampy depiote miisa efatra.
Synèse R.
French