Tsy niandry ela. Naneho ny hafaliny sy firariantsoa avy hatrany ny avy amin’ny faritra Atsinanana manontolo, tamin’ny alalan’ny governora, Rafidison Richard Théodore, mivady. “Midika ho fitohizan’ny asa fampandrosoana ny faritra, amin’ny alalan’ny fanamboarana ireo fotodrafitrasa goavana, hanala ny fahasahiranam-bahoaka izao fahalanianao izao”, hoy izy.
Notanisainy tamin’izany ny lalambe migodana “Autoroute” sy ny lalana ao Toamasina. Ny mampitohy an’ i Mahanoro sy Marolambo, ny Mahanoro-Vatomandry, ny ao Ilaka Atsinanana sy Antanambao Manampotsy.
Eo koa ny famoronana asa amin’ny alalan’ny fitohizan’ny tetikasa “Volobe II”. Manampy izany ny fanantenana lehibe amin’ny ahafahana mampiasa ny tamberim-bidin’ny fitrandrahana avy ao amin’ny tetikasa Ambatovy (Ristournes minières). “Andrandrain’ ny faritra sy ny kaominina maro hitondra fampandrosoana mivaingana ireo”, hoy izy. Nitsodrano ny filoha Rajoelina Andry, hahefabe ny fitantanana ny firenena amin’izao fe-potoam-piasana fanindroany izao indray izy ireo.
Sajo sy i Synèse R.
French